Ikaskuntza metodologia aktiboak Donostiako lehen hezkuntzako ikastetxeetan

Laburpena

Ikas-irakaskuntza paradigmak aldatu eta ikaslea erdigunean jartzen den garaiotan, irakasteko metodologia aktiboak erabiltzeko testuinguru aproposak sortu dira. Hori horrela izanda, gure testuinguruan gertatzen ari denaren zertzelada bat jaso nahi izan dugu, Donostiako Lehen Hezkuntzako ikastetxeetan metodologia aktiboek daukaten presentzia aztertuz. Horri buruzko datuak eskuratzeko galde-sortak betearazi eta elkarrizketak egin dira. Galde-sortak Donostiako 16 ikastetxetako 46 irakaslek bete dituzte; eta elkarrizketak egin zaizkie Donostiako Berritzeguneko aholkulari bati eta Hezkuntzako ikuskari bati. Emaitzek erakutsi dute zenbait metodologia aktibo ezagutu eta erabiltzen direla baina ez daudela guztiz barneratuta.