Teresa O'Heyne ustezko euskal dibulgatzaile zientifikoaren inguruko datu berriak

Laburpena

Idazlan honetan argibide gehiago aurkezten dira Teresa O'Heyneren inguruan. Uste dugu horrela sinesgarriagoa egingo dela dibulgatzaile honen egiazkotasuna. Datu berrien arabera, Teresa O'Heyne, Norvegian jaioa izan arren, Bilbon hazi zuten erdieuskalduna zen familia baten baitan. Bermeotar euskaldun batekin ezkondu zen eta euskara izan zen haren seme-alaben etxeetako hizkuntza. Badirudi ingelesez ere egiten zuela. Horiek horrela, nahikoa onargarria da Teresa O'Heyne izatea «Nola serbitu bear dan Peruco chori-ongarria eta dagoquion usaera lur landu bacoitzetan» (1878?) testuaren paratzailea, eta, beraz, baita euskal dibulgazioaren aurrendari bat, lehen ordukoa.