Material biologikoen integrazioa teknologian: biosentsoreak

Laburpena

Gertaera biologikoen detekzioa eta monitorizazioa funtsezkoak dira industria farmazeutikoan, ingurumen analisien arloan, eta medikuntzaren praktikan, besteak beste. Horretarako erabiltzen diren biotestak gero eta tamaina txikiagoan fabrikatzea gaur egungo ikerkuntz-erronka da. Biodetekziorako testak neurri oso txikian fabrikatu (miniaturizatu) eta erabiltzearen abantailak ugariak dira:  analisi-denbora eta kostu ekonomikoak jaitsi, manipulazioa sinplifikatu, sentikortasuna hobetu, eta gertaera biologikoen jarraipena erraztu egiten dira. Miniaturizaturiko biotest (biodetektore edo biosentsore)  horien bidez lortutako informazioa era sistematikoan bildu daiteke eta, gainera, beste biodetekzio tresna batzuen bidez lortu ezin daitekeen informazioa eskuratu. Artikulu honetan, biosentsoreak tamaina txikian fabrikatzeko erabiltzen diren teknika ohikoak eta aurreratuak deskribatzeaz gain, transdukzio-mekanismoren araberako sailkapena aurkeztuko da, aplikaziorik esanguratsuenak azpimarratuz. Etorkizunari begira, miniaturizazioaren aurrepausoa oso garrantzitsua izan da automatizazio eraginkorra lortzeko eta detekzio multiplexatuak burutzeko bidea ireki duelako. Nahiz eta era intentsiboan erabiliak izan daitezen gainditu beharreko fabrikazio-zailtasunak dauden, biosentsore miniaturizatuen aplikazioa arlo askotara hedatuko den iragarpena egin da, lehentasunezko erabakiak hartzearen lana erraztuz.