IGARRITZ: euskarazko testu predikziorako web ingurune egokitua

Laburpena

Motrizitate mugatua duen ikasleak, garun paralisi batek sortuak adibidez, tresna egokituak izaten dituzte testuak idazteko, esaterako, begiradaren jarraipeneko hardware bat, zeinarekin ordenagailuan letrak aukeratu eta sistemak iragartzen dituen hitzak aukeratu daitezkeen. Sistema hauek euskaraz idazteko baliabideak izaten dituzte, edo euskarazko hitz zerrendak sartuta iragarpenak aukeratu daitezke. Edozein testu iragarpenen xedea da testua idazteko esfortzua murriztea eta testu gehiago idaztea edo azkarrago egitea. Irisarekin idaztea hamar hatzamarrekin idaztea baino geldoagoa eta nekezagoa da; horrez gain, testu iragartzaileak euskaraz beste hizkuntzetan baino okerrago ibiltzen dira, eta nekez laguntzen dute. Lan honen helburua da euskarazko testu predikziorako web ingurune egokitu bat egitea adimen artifizialeko teknikak erabiliz. Horretarako, euskarazko hizkuntza-ereduetan oinarrituriko web interfazea sortu dugu, IGARRITZ izenekoa. Sortutako testu iragarleak Transformer arkitektura erabiltzen du, eta HiTZ/roberta-eus-euscrawl-base-cased hizkuntza-eredua berrentrenatu da hezkuntzarako corpusarekin (Gizapedia eta hezkuntzari buruzko testuak: Wikipediakoak eta Berriakoak). Bukatzeko, tresna ebaluatu eta egun eskura dagoen beste sistema batekin konparatu dugu, Bigarren Hezkuntzako ikasle batek ekoitzitako testuekin. Emaitzen arabera, IGARRITZek euskarazko testu predikzioa hobetu egiten du, eta irisarekin idazten duen pertsonak berak askoz errazago eta gehiago idazten duela adierazi du. Horrez gain, ebaluazio automatikoa egin dugu, eta hor ere emaitzak hobetzea lortu ditugu.