Antigorputz-Farmako Konjugatuak (ADC): minbiziaren aurkako terapien etorkizuna?

Laburpena

Antigorputz-farmako Konjugatuak (ingelesetik, Antibody-Drug Conjugates, ADC), lokarri kobalente kimiko baten bidez farmako zitotoxiko bati lotuta dauden antigorputz monoklonalak (ingelesetik, monoclonal antibodies, mAb) dira. Farmakoaren toxikotasuna antigorputzaren espezifikotasunarekin konbinatuz, minbizi-zelulen ezabaketa eraginkorra lortzen dute ADCek. Minbiziaren aurkako ADC eraginkorrak diseinatzeko, beharrezkoa da mAb-ak ezagutuko duen itu egokia hautatzea, molekula zitotoxiko indartsuak erabiltzea eta, odolean egonkortasun handia eta zelula-barneko askapen eraginkorra bermatzeko, farmakoaren eta antigorputzen arteko konjugazio-metodo egokiak erabiltzea. Alderdi horietan egindako aurrerapenen ondorioz, Ameriketako Estatu Batuetako (AEB) Elikagai eta Sendagaien Administrazioak (ingelesetik, Food and Drug Administration, FDA) 13 ADC onartu ditu, eta 140 hautagai baino gehiago daude fase klinikoetan. Minbiziaren aurkako farmako berri hauek terapia zuzenduaren aro berri bat gidatzen ari dira. Horregatik, ADCen osagaien alderdi molekularrak, haien ekintza-mekanismoa eta faktore hauek farmakoaren jardueran nola eragiten duten berrikusten dugu lan honetan. Horrekin batera, onartutako ADCak berrikusten dira, baita haien hurrengo belaunaldien garapenerako egungo eta etorkizuneko erronkak ere.