Euskal Herriko eta Europako kazetari eta prentsa irakurleak lanbidearen geroari begira. Adostasun eta desadostasunen bilduma

Laburpena

Lan honek Euskal Herriko eta Europako prentsa irakurleei eta kazetariei eginiko lau inkesta analitikoren emaitzak, eta horien alderaketak, eskaintzen ditu, azpimarra Euskal Herrikoetan jarriz. Euskal Herrian, 200 irakurle galdekatu dira, eta, 500, Europako bost estatu populatuenetan. Itaundutako kazetariak, aldiz, guztiak ere ibilbide garrantzitsua dutenak eta erantzukizun postuetan dabiltzanak, 19 izan dira Euskal Herrian eta 54 Alemanian, Erresuma Batuan, Italian, Frantzian eta Espainian. Kazetaritzaren etorkizunari begira, irakurleen eta kazetarien artean egon daitekeen sintoniari erreparatu nahi izan zaio, batez ere, eta baita Euskal Herriaren eta Europaren artean egon daitezkeen ezberdintasun eta parekotasun esanguratsuenei ere.