CO2-aren balorizazio zuzena hidrokarburoak ekoizteko

Resumen

Erregai fosilen errekuntzek eragindako klima-aldaketa pairatzea da egungo gizartearen erronka nagusietariko bat. Errekuntza horiek isuritako berotegi-efektuko gasen artean ugariena karbono dioxidoa (CO₂) da, haien % 75 inguru. Beraz, honen emisioak murriztea eta dagoeneko isuritakoa bahitzea ezinbestekoa da klima-aldaketak eragindako ingurumen-kaltea ahalik eta gehien murrizteko. Horretarako, ezinbestekoak dira CCU teknologiak (karbono dioxidoaren bahiketa eta erabilera). CO₂-a erabiltzen duten prozesuen artean, bihurtze katalitikoak etorkizun laburrean ezartzeko aukera onak ditu. Prozesu katalitikoen artean, ohikoena CO₂-aren hidrogenazioa da, hidrokarburoak lortuz. Prozesu honen moldakortasuna da bere ezaugarri interesgarrienetakoa; izan ere, modu hautakorrean hidrokarburo ezberdinak ekoizten dira; besteak beste, olefinak, parafina astunak zein arinak eta aromatikoak. Operazio baldintzak, katalizatzaile motak eta beren ezaugarriak, zein lorturiko CO₂-aren balorizazio-mailak ekoiztu nahi den hidrokarburoaren araberakoak dira.