251 - Enpresa eta Ekonomia Aldizkaria-ren bultzatzailea EHUko Ekonomia eta Enpresa Fakultatea (Gipuzkoako Atala) da. Aldizkari honen helburua ikerketa akademikoa eta irakaskuntza berritzailea indartzea da, diziplinako ikertzaileen arteko loturak sendotuz eta komunikazioa erraztuz. Bereziki inguruko ikertzaile, ikasle eta agenteei zuzenduta egoteaz gain, zabalkunde handiagoa lortzea eta, posible den neurrian, nazioarteko ikuspegia ere garatzea du helburu.

Aldizkariaren helburu nagusia ekonomiaren eta enpresaren esparruan euskarazko argitalpen zientifikoen kanal bat sendotzea da, ezagutzaren transferentzia, eztabaida akademikoa eta EHUren barruan zein kanpoan egindako ikerketen ikusgarritasuna sustatuz. Bere gai-arloetan kalitatezko ikerketa originalak argitaratu nahi ditu, ekonomia eta enpresako irakaskuntza-praktikei buruzko hausnarketa kritikoa sustatuz. Euskarak eremu horietan hizkuntza zientifiko gisa duen presentzia indartzea eta akademiaren eta gizartearen arteko zubi gisa jardutea ere badu helburu.