Anjel Lertxundiren pertsonaien izenak

Laburpena

Euskal esaera zaharrak dioenez, izena duenak izana ere badu, eta hala uste du Anjel Lertxundik, erreparatzen baldin badiegu bere eleberrietako pertsonaien izenak hautatzerakoan erabiltzen dituen irizpideei. Gainerako literatura hautuetan bezala, Lertxundik gogoeta sakon baten ondorioz ematen die bere pertsonaiei honako edo horrako izena. Eta, txit eskuzabala denez, idazte prozesu horren berri zehatza ematen digu bere saiakera, hitzaldi eta prentsa-zutabeetan, bai eta, gure kasuan bezala, harekin aurrez aurre gaudenean ere. Iturri horietatik guztietatik ateratakoak dira hemen aletzen ditugun datu eta ondorioak.